Hər bir Azərbaycan insanı vergiləri sayəsində formalaşan büdcə vəsaitinin necə xərcləndiyini bilməlidir. Bu onun haqqı və hüququdur...

Beyləqan Rayon İcra Hakimiyyəti Maşın və avadanlıqların, eləcə də, Dəftərxana və təsərrüfat mallarının alınması ilə bağlı müqavilələr imzalayıb. 02.09.2026-cı il tarixdə dövlət satınalmalarının vahid internet portalında yerləşdirilmiş məlumata görə, bu məqsədlə birinci epizodla bağlı "APO RM GROUP" MMC ilə 7998 manatlıq, ikinci epizodla bağlı isə "ALBARO" MMC ilə 5200 manatlıq razılaşmalar rəsmiləşib.

Hər iki müqavilədə bir ortaq nöqtə diqqət çəkir: Bütün epizodlarda tərəflər arasında satınalma proseduru dövlət satınalmalarının vahid internet portalında keçirilməmişdir (elektron satınalma deyil). Hər iki satınalma bir mənbədən satınalma metodunun tətbiqi ilə həyata keçirilmiş və satınalma barədə elan heç bir mətbuat orqanında dərc edilməmişdir(?)

Elə bu faktor məlum səbəblərdən ciddi suallar doğurur, əsaslı şübhələrə rəvac verir...Bu istiqamətdə oxucularımızın “Yenixeberorg”a ötürdüyü məlumata görə, tərəflər arasındakı bu əməkdaşlığın özünəməxsus səbəbləri var... Yuxarıda qeyd etdiyimiz kimi, Beyləqan Rayon İcra Hakimiyyəti müvafiq satınalma müsabiqələri elan etmədən, bir mənbədən olmaqla sadaladığımız şirkətlərlə müqavilələr bağlayıb.

Bu sözün bəlli mənasında maraq doğuran faktor olmaqla bərabər, məlum qanunla qadağan da deyil. Amma,...müvafiq əsaslandırmalarla!

Bu arada qeyd edək ki, Azərbaycan Respublikasının “Dövlət satınalmaları haqqında” Qanunun 15.1 maddəsində göstərilir ki, məxfi məlumatlarla əlaqəli satınalmalar istisna olmaqla, bütün dövlət satınalmaları yalnız məlum portal vasitəsilə həyata keçirilir.

Eyni zamanda Qanunun 49-cu maddəsində qeyd olunur ki, bir mənbədən satınalma metodu aşağıdakı hallarda tətbiq olunur: satınalma predmeti yalnız hər hansı konkret təchizatçıda olduqda; satınalma predmetinin əvəzedicisi və alternativi olmadıqda; satınalma predmetinə təcili tələbat yarandıqda; təbii fəlakətlər, texnoloji qəzalar, epidemiyalar baş verdikdə və fövqəladə xarakter daşıyan digər hallarda bilavasitə insanların həyat və sağlamlığına vurulan ziyanın qarşısının təcili alınması məqsədilə; satınalma predmeti kəşfiyyat və əks-kəşfiyyat fəaliyyətini təmin edən tələbata aid olduqda.

Göründüyü kimi, "Dövlət satınalmaları haqqında" Qanunda bir mənbədən satınalamaları zəruri edən şərtlər aydın şəkildə sadalanır...

İndi isə sual olunur: Beyləqan Rayon İcra Hakimiyyətinin Maşın və avadanlıqların, eləcə də,  Dəftərxana və təsərrüfat mallarının alınması ilə bağlı sadaladığımız şirkətlərlə birbaşa müqavilə bağlaması hansı səbəblərdən qaynaqlanır???

Yoxsa, Beyləqan Rayon İcra Hakimiyyətini müvafiq Maşın və avadanlıqlarla, eləcə də, Dəftərxana və təsərrüfat malları ilə təmin edə biləcək başqa şirkətlər yoxdur...(?) Baxın, ən aktual və cavablandırılması vacib sual da, məhz budur!

Bu prosesdə dövlətin pulunu xərcləyən tərəf kimi, Beyləqan Rayon İcra Hakimiyyəti tərəfindən hansı məsul şəxslər iştirak edib, rəhbərlik kimə məxsus olub?

Siyahıda yer alan şirkətlər hansı üstünlükləri ilə və hansı meyarlarla seçilib? Və s...

***

Digər vacib bir məqam Beyləqan Rayon İcra Hakimiyyətinin Maşın və avadanlıqlar aldığı (Yaxud alacağı. Red.) "APO RM GROUP" MMC ilə bağlıdır. İnternet üzərindən apardığımız araşdırmalarla məlum oldu ki, bu şirkət müxtəlif dizaynlı hovuzların tikintisi üzrə ixtisaslaşıb. Təsəvvür edirsiniz hovuz tikən şirkət və maşın və avadanlıqlar...(?)

"ALBARO" MMC ilə bağlı isə internet üzərində geyim modelləri ilə rastlaşmaq mümkündür...(?)

***

Biz “Yenixeberorg” olaraq, bu və digər şübhələrə aydınlıq gətirmək məqsədi ilə Beyləqan Rayon İcra Hakimiyyətinin başçısı cənab Əziz Əzizova 6 sualdan ibarət online rəsmi sorğu ünvanladıq...Təəssüf ki, sorğumuz hələ də cavabsız olaraq qalır(?)

Haşiyə: Əziz Əzizov icra hakimiyyəti strukturunda təcrübəli kadr kimi tanınır... Xatırladaq ki, cənab Əzizov 8 avqust 2006- 2 fevral 2018-ci illərdə Cəlilabad rayonuna, 2 fevral 2018-12 noyabr 2019-cu illərdə Yasamal rayonuna, 12 noyabr 2019-28 iyun 2024-cü illərdə Suraxanı rayonuna rəhbərlik edib. 8 iyul 2024-cü ildən isə Beyləqan Rayon İcra Hakimiyyətinin başçısıdır...

              Və son əvəzi...

Əvvəla, hörmətli icra başçısına xatırlatmaqda fayda var ki, hər bir Azərbaycan insanı vergiləri sayəsində formalaşan büdcə vəsaitinin necə xərcləndiyini bilməlidir. Bu onun haqqı və hüququdur...

Dövlət büdcəsi nə kiminsə dədə-babasından qalma xəzinə deyil, nə də hansısa yardım fondu deyil ki, ölkə ictimaiyyəti və aidiyyatı dövlət orqanları tərəfindən bir o qədər də, maraqlı görünməsin... Dövlətin pulun heç bir məmur, səlahiyyət sahibi könülü istədiyi kimi xərcləyə bilməz, xərcləməməlidir də!

Eyni zamanda məlum funksiyaların icraçısı kimi medianın sorğusu da cavablandırılmalıdır. Təkcə ona görə yox ki, hansısa yanlış informasiya tirajlana bilər, həm də ona görə ki, bu hər bir səlahiyyət sahibinin vəzifə borcudur. Gec də olsa bunu bilmək lazımdır...

Həm də onu bilmək lazımdır ki, heç bir vəzifə sahibi bir gün “qapısının döyülmədən açılacağından” sığortalanmayıb.(Yenixeberorg.biz)

Gundemxeber.org

"Alliance Clinic" tibb müəssisəsi ilə bağlı redaksiyamıza ciddi şikayət və məlumatlar daxil olub. Daxil olan məlumatlarda klinikanın əməliyyat blokunun sanitariya-epidemioloji tələblərə cavab vermədiyi, əməliyyat otaqlarında havalandırma və ventilyasiya sisteminin normativlərə uyğun gəlmədiyi, hava mübadiləsi göstəricilərinin bərbad vəziyyətdə olduğu, eləcə də pasiyentlərin sağlamlığı üçün ciddi təhlükə yaradan digər texniki uyğunsuzluqların mövcudluğu qeyd edilir. Gundemxeber.org-a yazan jurnalist Ofeliya Davudqızı bildirir ki, "məsələnin ictimai sağlamlıq və pasiyent təhlükəsizliyi baxımından mühüm əhəmiyyətini nəzərə alaraq, tərəfimizdən 5 sentyabr tarixində Azərbaycan Respublikasının Səhiyyə Nazirliyinə 21 nömrəli rəsmi jurnalist sorğusu ünvanlanmışdı.  Səhiyyə Nazirliyinin Analitik Ekspertiza Mərkəzi (AEM) sorğumuza operativ və obyektiv şəkildə cavab verərək, qeyd olunan ünvanda müvafiq yoxlama tədbirlərinin həyata keçirildiyini və ciddi nöqsanların aşkarlandığını rəsmən bildirdi. AEM-in araşdırması nəticəsində müəssisədə tibbi fəaliyyət üçün istifadə edilən avadanlıqların normativ-texniki sənədlərinin təqdim edilmədiyi, reanimasiya sahəsindəki şəraitin qaydalara uyğunlaşdırılmadığı, əməliyyatxanaya keçiddə sanitariya normasının tələb etdiyi duş kabinəsinin ümumiyyətlə olmadığı, tibbi qazların yerləşdirildiyi sahənin müfəttişlərdən gizlədilərək baxışa təqdim edilmədiyi, camaşırxana otağının olmadığı və geyimlərin yuyulması üçün hər hansı şirkətlə müqavilənin belə bağlanmadığı müəyyən olunub.

Bunlarla yanaşı, lisenziyadan kənar tibbi fəaliyyətin göstərildiyi (İXM-in 215.1-ci maddəsi) və mənşəyi bilinməyən, normativlərə cavab verməyən, yaxud yararsız dərman vasitələrinin saxlanıldığı (İXM-in 221.1-ci maddəsi) təsdiqini tapıb. Ən qəribə məqam isə odur ki, klinikada əməliyyatxana və reanimasiyanın uzun müddətdir fəaliyyət göstərmədiyi iddia edildiyi üçün havalandırma və ventilyasiya sistemində laborator ölçmələr aparmaq belə mümkün olmayıb.  Bütün bu biabırçı siyahının başında duran şəxs – "Alliance Clinic"in baş həkimi və məsul vəzifəli şəxsi Fərid Eyvazovdur. AEM-in rəsmi cavabında açıq şəkildə qeyd olunur ki, yoxlama prosesində Fərid Eyvazov yoxlayıcı qrupun fəaliyyətinə açıq-aşkar maneələr yaradıb və yoxlamanın şəffaflığını pozmağa cəhd göstərib!

İnsan həyatına birbaşa cavabdeh olan bir tibb müəssisəsinin rəhbəri, baş həkim dövlət müfəttişinin qarşısını nə üçün kəsir? Normativə cavab verməyən dərmanları gizlətmək üçünmü, lisenziyasız göstərdikləri qanunsuz xidmətlərin üstünün açılmaması üçünmü, yoxsa təhlükəli tibbi qazların saxlandığı bərbad şəraiti göstərməyə utandığı üçünmü?

Aşkar olunmuş bu qanunsuzluqlara və dövlət nəzarətini həyata keçirən vəzifəli şəxslərə mane olduğuna görə Fərid Eyvazov barəsində İnzibati Xətalar Məcəlləsinin 215.1, 221.1 və 602.4-cü maddələri ilə protokollar tərtib edilib. Səhiyyə sahəsində baş həkim postunu tutan bir şəxsin öz müəssisəsini bu dərəcədə acınacaqlı vəziyyətə gətirməsi, üstəlik yoxlamadan qaçmaq üçün maneələr yaratması tibbi etikaya da, rəhbər məsuliyyətinə də sığmır. Pasiyentlərin canını etibar etdiyi bir klinikanın baş həkiminin dövlət yoxlamasına qarşı bu cür davranışı, onun öz fəaliyyətindəki qanunsuzluqları nə dərəcədə yaxşı bildiyinin sübutudur.  Biz redaksiya olaraq operativ reaksiya və obyektiv yoxlamaya görə Səhiyyə Nazirliyinin Analitik Ekspertiza Mərkəzinə təşəkkür edirik. Vətəndaşların sağlamlığını və hüquqlarını qorumaq adına "Alliance Clinic"dəki və Fərid Eyvazovun rəhbərliyindəki prosesləri diqqətdə saxlamağa davam edəcəyik."

Gundemxeber.org

Abşeron rayonunun Novxanı kəndinin sabiq bələdiyyə sədri Məhərrəm Əvəzov və onun yaxınlarının qanunsuz əməlləri ilə bağlı ölkə mediasıda zaman-zaman müxtəlif məqalələr yayımlanıb, konkret faktlara diqqət çəkilib. (https://aknews.az/index.php?newsid=5209 ).

Bugünlərdə adıçəkilən şəxslə bağl gundemxeber.org-un redaksiyasına yeni məlumat daxil olub. Məlumatlı mənbənin sözlərinə görə, bir neçə il bundan öncə vəzifəsindən azad edilməsinə baxmayaraq, bu gün də sabiq bələdiyyə sədri kənd ərazisindəki bəzi torpaqlarını “çəpərləmək”, bu torpaqlara sahib çıxmaqla məşğuldur. Belə ki, bugünlərdə keçmiş bələdiyyə sədrinin Novxanı kəndində “köhnə məscid” deyilən ərazidə yeni torpaq sahələrini zəbt etməyə başlayıb. “Köhnə məscid”in qarşsındakı torpaqları “işarələyən” Məhərrəm Əvəzov, məlum üsulla bu torpaqları özününküləşdirməyə başlayıb. Həmin torpaqların yaxın günlərdə sabiq bələdiyyə sədri tərəfindən satışa çıxarılacağı gözlənilir. 

Xatırladaq ki, Abşeron Rayon İcra Hakimiyyəti torpaqların qanunsuz mənimsənilməsinə qarşı mübarizə aparmasına, bu məsələdə prinsipial mövqe sərgiləməsinə baxmayaraq, hələ də keçmiş məmurlar tərəfindən oxşar hərəkətlərin baş verməsi müşahidə edilməkdədir. Ümid edirik ki, əlaqədar instansiyalar bu kimi özbaşınalıqların qarşısını alacaq və hər hansı özfəaliyyətə yol verməyəcək.

Qarşı tərəfin mövqeyini də dinləməyə hazırıq.

Gundemxeber.org

“Bakı Şəhər İşığı” Elektrik Şəbəkə Müəssisəsi tərəfindən işıqlandırma üçün lazımi mal-materialın satınalınması üzrə 10.04.2026-cı ildə başlanılmış açıq tenderə yekun vurulub. Müsabiqənin qalibi “İNTERKABEL” FİRMASI seçilib və tərəflər arasında 5.298.259,73 manat dəyərində satınalma müqaviləsi bağlanılıb. Məlumat satınalmaların portalında 11.09.2026-cı ildə dərc edilib.

Maraqlıdır ki, portalda müqavilənin icrasına başlama tarixi də bitmə tarixi də 11.09.2026-cı il göstərilib.

Qeyd edək ki, bu “Bakı Şəhər İşığı” Elektrik Şəbəkə Müəssisəsi ilə “İNTERKABEL” firması arasında bağlanan ilk satınalma müqaviləsi deyil.

İşıqlandırma üçün materialların satınalınması üzrə bir müqavilə də tərəflər arasında 16.05.2025-ci ildə bağlanılıb. Bu müqavilənin dəyəri 2.670.677,83 manat təşkil edib.

Ümumiyyətlə isə “Bakı Şəhər İşığı” Elektrik Şəbəkə Müəssisəsi ilə “İNTERKABEL” firması arasında 22.05.2020-ci ildən bu yana ümumi dəyəri 21 082 579 manat olan 10 satınalma müqaviləsi bağlanılıb.

Rəsmi saytında yerləşdirilmiş məlumata görə “İnterkabel” firması 25 ildən çoxdur ki, Azərbaycan Respublikasının elektrotexniki bazarında fəaliyyət göstərir. Artıq respublika satış bazarında özünü tanıdan, müxtəlif sahələr üçün kabel və məftil, transformator və elektrik məhsullarının topdan və pərakəndə satışında ixtisaslaşmış fəal inkişaf edən bir şirkətdir.

Kommersiya qurumunun hüquqi şəxslərin dövlət reyestrinə daxil edilmiş məlumatlara görə “İNTERKABEL” (VÖEN:1400410421) Firması 16.09.1997-ci ildə İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsində dövlət qeydiyyatına alınıb. Nizamnamə kapitalı 1000 manat olan firmanın hüquqi ünvanı BAKI ŞƏHƏRİ NƏRİMANOV RAYONU, NƏCƏF NƏRİMANOV, ev.5A-da yerləşir. Qanuni təmsilçisi Babayev Ramil Arif oğludur.

Firmanın təsisçisi və ilk qanuni təmsilçisi Molanov Yasin Xanoğlan oğlu olub. Manafov Rafiq Hidayət oğlu da firmanın qanuni təmsilçisi olub. Yalnız elan saytlarının birində MMC nin rəhbəri Fəxrəddin Ələkbərov göstərilib.

Qeyd edək ki, “Bakı Şəhər İşığı” Elektrik Şəbəkə Müəssisəsi Bakı şəhər İcra Hakimiyyətinə tabe olan, əsasnaməsinə görə məhəllədaxili yolların və həyətlərin, həmçinin yaşayış binalarının giriş qapılarının işıqlandırılmasına nəzarət funksiyasını yerinə yetirən bir qurumdur. İdarənin rəisi Eldar Eldarovdur.

Məlumatlara görə Eldar Əzizovun 2018-ci ilin noyabrında Bakı şəhər İcra Hakimiyyıtinin başçısı təyin edilməsindən az sonra Eldar Eldarov “Bakı Şəhər İşığı” Elektrik Şəbəkə Müəssisəsinin direktor təyin etmişdir. Məlumatlara görə  milliyətcə ləzgi olan Eldar Eldarov başçı adaşından başqa Bakı şəhər İcra Hakimiyyıtində heç kimi saymır.

Onu da qeyd edək ki, sözügedən qurum həm də Bakı şəhər İcra Hakimiyyətində ən çox dövlət vəsaiti ayrılan və ən çox da dövlət vəsaitinin mənimsənildiyi bir yerdir. Məlumatlara görə idarənin balansında xeyli sayda nəqliyyat vasitəsi var. İdarənin rəisi Eldar Eldarov avtonəqliyyat vasitələri üçün ehtiyyat hissələrinin satın alınmasından da kifayət qədər gəlir əldə edir. Bundan əlavə Eldar Eldarov aylarla dayanan nasaz avtomobillərə də iş vərəqi yazaraq yanacaq silir.

Bir sözlə Bakı şəhər İcra Hakimiyyıtinin başçısı adaşına arxayın olan Eldar Eldarov “Bakı Şəhər İşığı” Elektrik Şəbəkə Müəssisəsini istədiyi kimi idarə edir, istəmədiyini işdən çıxarır, istədiyini isə yüksək maaşla işə qəbul edir.

Məsələn Eldar Eldarov vəzifə başına keçən kimi “Bakı Şəhər İşığı” Elektrik Şəbəkə Müəssisəsi bir gün ərzində “Xəzər Elektrik” MMC ilə 1 400 357,92 manat məbləğində,  “Aktif Elektrik” MMC ilə 1 862 942.70 manat məbləğində müqvilə bağlanmışdır.

Adıçəkilən “Aktif Elektrik”  MMC İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsində 05.06.2017 ci ildə dövlət qeydiyyatına alınıb. Qanuni təmsilçisi Hüseynov Mahir Ədalət oğlu olan MMC-nin nizamnamə kapitalı 1 672 500.00 manat,hüquqi ünvanı Bakı şəhəri Nərimanov rayonu, NƏCƏF NƏRİMANOV, ev 5A, mənzil 25 göstərilib.

Göründüyü kimi “Bakı Şəhər İşığı” Elektrik Şəbəkə Müəssisəsinin milyon manat dəyərində müqavilə bağladığı “Aktif Elektrik”  MMC-də, “İnterkabel” firması da eyni ünvanda yerləşir. Bu isə şirkətlərin tender prosedurlarına bir nəfər tərəfindən cəlb edildiyini və idarə olunmasını deməyə əsaslar verir.

Satınalmaların portalından əldə etdiyimiz rəqəmlərdən də göründüyü kimi Eldar Eldarov “Bakı Şəhər İşığı” Elektrik Şəbəkə Müəssisəsinin başına rəhbər təyin edildikdən sonra, yəni son altı ildə Bakı şəhərində işıqlandırma üçün lazımi mal-materialın satın alınmasına 25 milyon manatdan çox dövlət vəsaiti xərclənib. Əsasnaməsinə görə məhəllədaxili yolların və həyətlərin, həmçinin yaşayış binalarının giriş qapılarının işıqlandırılmasına nəzarət edən bu qurumun gördüyü işlər də göz qabağındadır. Paytaxtın mərkəzi küçələrindən başqa ətraf ərazilərdə küçə və məhəllədaxili işıqlandırma bərbad vəziyyətdədir.

Gundemxeber.org

Gundemxeber.org xəbər verir ki, faktinfo.az saytının baş redaktoru çoxlu sayda ağac əkib. Ağaclara müxtəlif təyinatlar üzrə qulluq edib, onları yay aylarında hər gün, payız fəslində isə həftədə bir dəfə suvarıb. Eləcə də əkilən ağacları şəxsi əlaqələri hesabına əldə edib. Bu məlumatı SəngərTV- nin efirində yaşıllaşdırma sahəsi üzrə mütəxəssis , aqranom Xanəhməd Əsgərov səsləndirib. Xəbər yutubda yayımlanıb. Marağımızı nəzərə alıb Gundemxeber.org olaraq jurnalist Fuad İsgəndərovla əlaqə saxlayıb. Baş redaktor çinar və şam ağaclarından ibarət 50-yə yaxın ağacı 2023-cü il dekabr ayının 31- də əkdiyini, onlara bu günün özündə də bir neçə istiqamət üzrə qulluq edib, suvardığını sayıtımıza təsdiqlədi. Bakı şəhərində ağac əkməyin asan olduğunu, ağacı yetişdirməyin isə sistemli zəhmət tələb etdiyini qeyd etdi. O, bu barədə əlavə danışmağa ehtiyac duymadığını, sadəcə, xüsusilə yay aylarında atmosferdə insan arqonizmi üçün təhlükəli olan çirklənməni zərərsizləşdirmək baxımından əkilən hər bir ağacın gələcəkdə daha əhəmiyyət kəsb edəcəyini vurğuladı. Gundemxeber.org

Goranboy şəhər 2 saylı tam orta məktəbin sabiq direktoru İlhamə Qasımova redaksiyamıza müraciət edərək, barəsində səsləndirilən iddialara cavab verib.

Xatırladaq ki, saytımızın ötən buraxılışında sosial şəbəkələr üzərindən əldə etdiyimiz məlumat əsasında “Məktəbdə Şok Vandalizm: İşdən Çıxarılan Direktor Tualet Avadanlıqlarını Evinə Apardı – Goranboyda Rezonans Doğuran Hadisə” başlıqlı məqalə dərc olunmuşdu.

Qarşı tərəfin mövqeyini təmin etmək və media etikası prinsiplərinə uyğun olaraq, İ.Qasımovanın cavab mətnini olduğu kimi oxucularımızın diqqətinə çatdırırıq:

"Mənim haqqımda yayılan əsassız iddialara cavab

 Son günlər bəzi sosial şəbəkə səhifələrində və xəbər resurslarında mənim haqqımda həqiqəti əks etdirməyən, şəxsi və peşəkar nüfuzuma xələl gətirən müxtəlif iddialar yayılır.

Bildirirəm ki, həmin məlumatların həqiqətə uyğunluğu yoxdur. Mən uzun illər təhsil sahəsində çalışmış, üzərimə düşən vəzifələri vicdanla və məsuliyyətlə yerinə yetirmişəm. Fəaliyyətim dövründə məktəbin inkişafı, təhsilin keyfiyyətinin yüksəldilməsi və şagirdlərin təhlükəsizliyi istiqamətində əlimdən gələn bütün işləri görmüşəm.

Kiminsə mənim haqqımda hər hansı iddiası varsa, bunu sosial şəbəkələrdə deyil, qanun qarşısında sübut etməlidir. Əks halda, heç kimin mənim şərəf və ləyaqətimə, işgüzar nüfuzuma xələl gətirən məlumatlar yaymasına haqqı yoxdur.

Artıq məsələ ilə bağlı hüquq-mühafizə orqanlarına müraciət olunub və yayılan məlumatların hüquqi qiymətinin verilməsini gözləyirəm.

Mən heç kimlə şəxsi qarşıdurma aparmaq niyyətində deyiləm. Həqiqətin ortaya çıxacağına və əsassız ittihamların hüquqi müstəvidə öz qiymətini alacağına inanıram.

Bundan sonra mənim haqqımda məlumat yayan hər bir şəxsə çağırışım budur: iddianız varsa, sübut edin. Sübut edə bilmirsinizsə, insanların şərəf və ləyaqətinə toxunan əsassız məlumatlar yaymayın.

Həqiqət gec-tez üzə çıxır. Qanun qarşısında isə hər kəs məsuliyyət daşıyır."

Gundemxeber.org

“Devin Film” MMC-nin keçmiş hüquqşünası Xəyal Məmmədov olaraq, şirkətlə aramızda məhkəmə çəkişməsi olub. Bakı şəhəri Nərimanov Rayon Məhkəməsinin 10.08.2026-cı il tarixli, 1(5-97)-24/2026 nömrəli iş üzrə çıxardığı qərar mənim xeyrimə yekunlaşıb. Məhkəmə çıxışında şirkətin rəhbəri Atila Uysal, onun dostu Gökhan Ege və Elşən Əliyev adlı şəxslərin yanında adını sonradan öyrəndiyim gənc xanım — Minayə Hüseynovanı gördüm. Şəxsən tanımadığım bu xanımın simasındakı aqressiya və məyusluq diqqətdən yayınmırdı.

“Devin Film” MMC-dən zərər çəkən vətəndaşlardan biri — Mikayılzadə Şəbnəm Eysan qızı təmənnasız hüquqi yardım göstərilməsi üçün WhatsApp vasitəsilə mənə müraciət etmişdi. Nərimanov Rayon Məhkəməsinin xeyrimə çıxardığı qərarı görmək üçün elektron məhkəmə kabinetinə daxil olduqda, Atila Uysal tərəfindən təqdim edilmiş sənədlərin arasında həmin xanımla olan WhatsApp yazışmalarımızın mənim xəbərim və razılığım olmadan qarşı tərəfə ötürüldüyünü müəyyən etdim.

Bununla bağlı dərhal Nərimanov Rayon Polis Şöbəsinə şikayət ərizəsi təqdim etdim. Polis əməkdaşları operativ reaksiyalar göstərərək həmin şəxsi şöbəyə dəvət etdilər və izahatını aldılar.

Şəbnəm Mikayılzadə izahatında etiraf etdi ki, azyaşlı uşaqlarla birgə onları şirkətin əməkdaşı Sübhan Hüseynov “Devin Film” MMC-nin ofisinə (Xətai rayonu, 8 Noyabr küçəsi 4, “Amay” Ticarət Mərkəzi, 3-cü giriş, 2-ci mərtəbə) çağırıb. Şirkətin direktoru Atila Uysalın otağında o, dostları Gökhan Ege, Minayə Hüseynova və Pərviz Məlikəjdər tərəfindən psixoloji təzyiqə məruz qalıblar. Həmin şəxslər zərərçəkənlərdən Xəyal Məmmədovun əleyhinə mənfi, həqiqətəuyğun olmayan ifadələr verməyi və mənimlə olan WhatsApp yazışmalarını Minayə Hüseynovaya təqdim etməyi tələb ediblər.

Təhqiqatçı polis əməkdaşı Minayə Hüseynovanı da şöbəyə dəvət etdi. O, polis idarəsinə yenə Pərviz Məlikəjdər və Elşən Əliyevin müşayiəti ilə gəlmişdi. Üzləşmə zamanı onu məhkəmə binasının qarşısından tanıdığımı xatırladım. “Devin Film” MMC-nin rəsmi əməkdaşı və ya hər hansı hüquqi tərəfi olmayan bu xanım, azyaşlıları və gəncləri qanunsuz əməllərə sövq etməsinin səbəbini izah edə bilmədi.

Ona müraciət edərək bildirdim:

“Sizin bu şirkətlə nə kimi marağınız var ki, atanız yaşda olan şəxslərin yanında həm məhkəməyə, həm də polisə gəlir, bu cür qanunsuzluqlara şərik olursunuz? 'Devin Media' tərəfindən dələduzluğa məruz qalanlar arasında qazilər, şəhid ailələri və zorakılıq görmüş gənc xanımlar var. Başqa işiniz-gücünüz yoxdur?”

Bu sualların müqabilində o, mənə qarşı kobudluq etməyə başladı.

Sonradan aparılan araşdırma zamanı məlum oldu ki, Minayə Hüseynova müğənniliklə məşğuldur, bir neçə televiziya musiqi yarışmasında iştirak etsə də, uğur qazana bilməyib.

Hazırda adıçəkilən şəxslər barəsində Xətai Rayon Polis İdarəsinin İstintaq Şöbəsində cinayət işi başlanılıb, araşdırmalar davam etdirilir.

Gundemxeber.org

GundemXeber.org olaraq jurnalist Samir Feyruzovun araşdırma yazısını oxucularımıza təqdim edirik:

"Bu günə qədər dərc etdiyimiz araşdırmalarda Elm və Təhsil Nazirliyində formalaşan qruplaşmanın dövlət satınalmaları üzərindən on milyonlarla manat dövlət vəsaitini talamasına dair ciddi fakt və sübutlarla çıxış etmişik. Təkzibolunmaz faktlar göstərir ki, nazirin dostları və sinif yoldaşlarından ibarət qruplaşmanın əsas üzvləri — Tural Ayvazlı, Valeh Mirzalıyev, Elnur Əliyev və başqaları bütün maliyyə dövriyyəsinə nəzarəti ələ keçirərək dövlət büdcəsini şəxsi maraqlarına xərcləməklə məşğuldurlar.

Korrupsiya şübhəsi doğuran çoxmilyonluq tender

Bu dəfə Elm və Təhsil Nazirliyinin tabeliyindəki Təsərrüfathesablı Əsaslı Tikinti və Təchizat İdarəsi (VÖEN: 1500016711) ilə “Təhsildə İnnovativ Texnologiyalar Əlavə Təhsil Mərkəzi” MMC (VÖEN: 1402405651) arasında 23 may 2024-cü ildə bağlanan 038-B/24 nömrəli satınalma müqaviləsindən bəhs edəcəyik.

Nazirliklə müqavilə bağlayan şirkətin təsisçisi həmin Nazirlikdə idarə rəisidir

“Təhsildə İnnovativ Texnologiyalar Əlavə Təhsil Mərkəzi” MMC 30 avqust 2012-ci ildə Bakı şəhəri Lokal Gəlirlər Baş İdarəsində dövlət qeydiyyatına alınıb. Reyestr məlumatlarına görə, şirkətin nizamnamə kapitalı cəmi 100 manatdır. MMC-nin hüquqi ünvanı Bakı şəhəri, Nəsimi rayonu, Hüseynbala Əliyev küçəsi, ev 4, mənzil 105 göstərilir. Şirkətin qanuni təmsilçisi Emin Əlövsət oğlu Axundovdur. Reyestr dəyişiklikləri tarixçəsinə əsasən, MMC-nin təsisçisi Vüsal Tərlan oğlu Xanlarovdur.

Bəs Vüsal Xanlarov kimdir? Elm və Təhsil Nazirliyində Təhsil Sisteminin İnformasiyalaşdırılması İdarəsinin rəisi…

Yəni Nazirlik milyonlarla manatlıq müqavilə bağlayır, qarşı tərəfdə dayanan şirkətin təsisçisi isə həmin Nazirliyin idarə rəisidir. Başqa sözlə, dövlət vəsaiti hesabına satınalma aparan qurumun əməkdaşı eyni zamanda bu satınalmadan gəlir əldə edən şirkətin sahibidir. Bu fakt tenderin şəffaflığını doğrudan da böyük sual altına qoyur.

038-B/24 nömrəli müqavilənin predmeti STEAM əsaslı tədrisin təşkili xidmətlərinin satın alınmasıdır. Satınalan təşkilatı nazir Emin Əmrullayevin dostu və sinif yoldaşı Valeh Taleh oğlu Mirzalıyev, təchizatçı şirkəti isə onun qanuni təmsilçisi Emin Əlövsət oğlu Axundov təmsil edib. Satınalan təşkilatın hüquqi ünvanı Bakı şəhəri, Nərimanov rayonu, Seyid Yəhya Bakuvi küçəsi 18, təchizatçı şirkətin ünvanı isə Nəsimi rayonu, Hüseynbala Əliyev, ev 4, mənzil 105 kimi göstərilib. Müqavilənin ümumi dəyəri milyonlarla manat təşkil edib.

300 min manat “Training Plus” MMC-nin hesabına köçürülüb və sonradan nağdlaşdırılıb?

Araşdırma daha bir diqqətçəkən müqaviləni ortaya çıxarıb. “Təhsildə İnnovativ Texnologiyalar Əlavə Təhsil Mərkəzi” MMC ilə “Training Plus” MMC (VÖEN: 1308571521) arasında 25 oktyabr 2024-cü ildə 038-24140 nömrəli xidmət müqaviləsi bağlanıb.

Sifarişçi qismində Emin Axundovun rəhbərlik etdiyi MMC, icraçı qismində isə Elnarə Rəşadət qızı Qasımlının rəhbərlik etdiyi “Training Plus” MMC göstərilib. Nizamnamə kapitalı cəmi 10 manat olan bu şirkət Bakı şəhəri, Yasamal rayonu, Əsəd Əhmədov küçəsi, ev 27D, mənzil 192 ünvanında qeydiyyatdadır.

Müqavilənin predmeti STEAM təhsili üzrə “Rəqəmsal bacarıqlar” və “Səriştə əsaslı suallarla işləmə yollarının öyrədilməsi” mövzusunda təlimlərin təşkilidir. Bu xidmət üçün dövlət vəsaitindən 300 min manat ayrılıb. Redaksiyamıza daxil olan məlumata görə, müqavilə üzrə nəzərdə tutulan 300 min manat “Training Plus” MMC-nin hesabına köçürülüb və həmin vəsait sonradan nağdlaşdırılıb.

Məsələnin bütün detalları, o cümlədən pulun sonrakı hərəkəti hüquq-mühafizə orqanları tərəfindən bank əməliyyatları və maliyyə sənədləri əsasında yoxlanılmalıdır. Korrupsiya şübhəsini gücləndirən əsas məqam ciddi internet resursu olmayan “Training Plus” MMC-yə bu məbləğin ödənilməsinin iqtisadi əsaslandırmasının qaranlıq qalmasıdır.

Sosial şəbəkələrdə və internet resurslarında müqavilə tarixlərinə uyğun olaraq bu təlimlərin keçirildiyini təsdiqləyən hər hansı məlumat tapmaq mümkün olmayıb.

Əgər dövlət vəsaitləri talanmayıbsa…

Nazir Emin Əmrullayevin komandasından 300 min manatlıq xidmətin faktiki göstərildiyini təsdiqləyən sənədləri — təhvil-təslim aktlarını, iştirakçı siyahılarını, davamiyyət cədvəllərini, təlim proqramlarını, foto-video materialları, təlimçi müqavilələrini, əməkhaqqı ödənişlərini və yekun hesabatları ictimaiyyətə açıqlamasını gözləyirik.

Əgər bu sənədlər açıqlanmayacaqsa, Baş prokuror yanında Korrupsiyaya qarşı Mübarizə Baş İdarəsinin bu faktları hüquqi baxımdan qiymətləndirməsi məqsədəuyğundur.

Cavablandırılması vacib olan suallar:

 038-B/24 nömrəli əsas müqavilə və satınalma şərtləri subpodratçı cəlb edilməsinə icazə verirmi?

 Satınalan təşkilat “Training Plus” MMC-nin prosesə cəlb edilməsindən xəbərdar olubmu və bununla bağlı yazılı razılıq verilibmi?

 “Training Plus” MMC-yə ödənilən 300 min manat əsas müqavilədə nəzərdə tutulan konkret hansı xidmətin icrasına görədir və bu dəyər ilkin qiymət təklifinə daxil edilibmi?

 “Training Plus” MMC-nin texniki imkanları və təlimçi heyəti bu həcmdə xidməti göstərməyə kifayət edirdimi?

Nağdlaşdırma nə vaxt pul yuyulması şübhəsi yaradır?

Şirkətin hesabından pul çıxarılması öz-özlüyündə cinayət sayılmır. Lakin xidmətin faktiki göstərilmədiyi, sənədlərin saxtalaşdırıldığı, qiymətin şişirdildiyi və vəsaitin sonradan vəzifəli şəxslərə qaytarıldığı müəyyən edilərsə, bu əməliyyatlar mənimsəmə, korrupsiya və cinayət yolu ilə əldə edilmiş vəsaitlərin leqallaşdırılması şübhəsi yaradır.

Yenə də Elnur Əliyev və digər şirkətlər…

Elm və Təhsil Nazirliyində şəffaflığı şübhə doğuran layihələr bununla bitmir. Reyestr məlumatlarına görə, Elnur Qəzənfər oğlu Əliyevin təsisçisi olduğu “Peşəkar Təlim və İnkişaf Mərkəzi Əlavə Təhsil Müəssisəsi” MMC (VÖEN: 1802977201) 21 aprel 2016-cı ildə qeydiyyata alınıb. Qanuni təmsilçisi Mehtiyev Nəcməddin Saday oğlu olan şirkətə 2016-2024-cü illərdə vergi hesabatlarının vaxtında təqdim edilməməsinə görə dəfələrlə maliyyə sanksiyası tətbiq olunub.

Araşdırdığımız digər şirkətlər sırasında “Edupark” MMC (VÖEN: 2004997201) və “Innovative Business Products” MMC (VÖEN: 1002491601) də var. Bu qurumların Nazirliklə xidmət münasibətləri ayrıca araşdırma mövzusudur. Eyni zamanda, Təhsil İnstitutunun tabeliyində olan Təhsil Texnologiyaları Mərkəzinin (VÖEN: 2000489501) rəhbəri Emin İbrahimovun fəaliyyəti, STEAM, icma əsaslı məktəbəqədər təhsil və peşə təmayüllü siniflər layihələri çərçivəsində dövlət vəsaitlərinin xərclənmə mexanizmi növbəti yazılarımızda konkrekt faktlarla təqdim olunacaq." Gundemxeber.org

Son günlər kütləvi informasiya vasitələrində və sosial şəbəkələrdə Vətən müharibəsi şəhidi Xudayar Yusifzadənin anası Radə xanıma qarşı yönəlmiş təxribat xarakterli, qərəzli materiallar diqqət çəkir. Müəyyən dairələrin və ya sifarişli qələm sahiblərinin mənəvi sərhədləri aşaraq bir şəhid anasını hədəf alması, onu ittiham etməsi və Bərdə rayonu üzərindən əsassız şayiələr dövriyyəyə buraxması heç bir mənəvi-əxlaqi çərçivəyə sığmır.

  Şuşanın Cıdır düzündə, şəhidlərimizin qanı ilə suvarılmış torpaqlarda xalqın sevgisi ilə qayalara həkk olunmuş adların silinməsinə ananın etiraz etməsi tamamilə təbiidir. Bir ananın öz övladının adını gördüyü yerə sarılması və o adın silinməsinə yanması onun haqlı mənəvi hüququdur. Bunu “həyasızlıq” kimi qələmə vermək, hadisəni siyasiləşdirib şəhid anasını “məmur divara dirəyən”, “şəriət quran” kimi təqdim etmək məqsədli qaralama kampaniyasının tərkib hissəsidir.

  Məqalədə istifadə olunan kəskin, təhqiramiz və qərəzli leksikon aydın göstərir ki, məqsəd sadəcə Şuşadakı qayalıqların təmizlənməsi məsələsi deyil. Şəhid anasının sosial platformalardakı və ya yerli mühitdəki fəallığını təhlükə kimi görən, onun haqlı tələblərindən narahat olan bəzi idarəçi və ya məmur təbəqəsi öz mətbu vasitələri ilə mənəvi terror həyata keçirir.

  Dövlətin şəhid ailələrinə göstərdiyi diqqət, verilən ev, təyin olunan təqaüd və təltiflər şəhidin qanı ilə qazanılmış haqqıdır. Bu qayğını şəhid anasının başına qaxınc etmək, "Sənə hər şey verilib, susmalısan" məntiqilə yanaşmaq böyük mənəviyyatsızlıqdır.

 Bəziləri unudur ki, Xudayar Yusifzadə adı təkcə rəsmi abidələrdə deyil, bu millətin qəlbindədir. Cıdır düzündəki qayaya yazılan o ad xalq sevgisinin təzahürü idi.

  Şəhid analarına necə davranmalı olduğunu diktə edənlər, onları “itaətkar” və ya “səssiz-səmiriz” görmək istəyənlər əslində şəhidlərimizin rəşadətinə kölgə salırlar. Bir ananın övladının adına göstərdiyi həssaslığı "mənfəət güdmək" kimi qələmə vermək şəhidin xatirəsinə edilən ən böyük hörmətsizlikdir. Şəhid ailələrinə mənəvi təzyiq göstərmək, onları ictimaiyyətin gözündən salmağa çalışmaq heç bir qələm sahibinə başucalığı gətirməz. Bu millət kimin xalqın qəhrəmanı, kimin isə sifarişli yazı yazdığını çox yaxşı bilir.

Şirin Cəfəri

Ölkəmizdə palma yağlarının idxalı sürətlə artmaqdadır. Gundemxeber.org qeyd edir ki, bugünlərdə musavat.com saytında bununla bağlı yer alan məqalə bunu bir dha təsdiq edir. (https://www.musavat.com/news/olkeye-palma-yagi-getirilmesinde-rekord-daha-hami-yeyir_1284491.html )

 Məqalədən məlum olur ki, Azərbaycan palma yağlarının idxalını əhəmiyyətli dərəcədə artırıb. Baxmayaraq ki, ölkə marketlərində sırf palma yağı tapmaq mümkün deyil.

Maraqlıdır, bəs idxal olunan bu yağlar hara gedir? AQTA bu tağların aqibəti ilə maraqlanıbmı? Maraqlanıbsa, bunun nəticələri haqqında ictimaiyyətə hansı məlumatları verib?

Bu və bu kimi məsələlərə toxunmamışdan öncə palma yağı və onun insan sağlamlığına olan mümkün təsirlərinə diqqət çəkək.

 Liberal İqtisadçılar Mərkəzinin rəhbəri Akif Nəsirli mətbuata açıqlamasında palma yağı ilə bağlı aşağıdak fikirləri səsləndirib:

 “Palma yağının əslində qida məhsulu kimi istifadəsinin arzuolunan olmamasının səbəbi var. Belə ki, palma yağının iki forması var. Biri palmanın lətindən hazırlanan yağdır. Bu, ərzaq məhsulu kimi çox dəyərlidir. Özü də dünya bazarında baha qiymətə satılır. Amma Meksika, İndoneziya və digər bu kimi ölkələrdə kütləvi şəkildə istifadə edilən palma yağı palmanın çəyirdəyindən hazırlanır. Palmanın çəyirdəyindən hazırlanan yağın molekullarının insan həzm sistemində sorulması mümkün olmur. Davamlı şəkildə qəbul edəndə isə artıq orqanizmdə yağ artıqları yaranır. Başqa yağ olmadığına görə bağırsaqdakı süzgəclər, filtrlər aralanıb qalxır və palma yağı qana keçir.

 Çünki onun həm də ərimə temperaturu orqanizmin daxili temperaturundan yüksəkdir. Yəni orqanizmin daxili temperaturu 30 dərəcəyə yaxındırsa, palma yağı 43-45 dərəcədə əriyir. Yəni çətin əriyir, molekulları böyük olduğuna görə həzm sistemi onu qəbul edə bilmir. Nəticədə orqanizmin müxtəlif hissələrində o yağlar depolanır, beləliklə, insanlar kökəlməyə başlayır. Bu kökəlmək də mühüm xəstəliklərin səbəbi olur. Yəni alimlərin əldə etdikləri şübhə olunan zərərlər budur".

 Ekspert bildirir ki, palma çəyirdəyindən hazırlanan yağ dünya bazarında ucuzluğu ilə seçilir: “Palmanın çəyirdəyindən hazırlanan yağ dünya bazarında 1-2 dollar arasındadır. Bu səbəbdən də Azərbaycan sahibkarları həmin yağı ölkəyə idxal edirlər və bütün ərzaq məhsullarının, marketlərdə satılan bütün ağartı məhsullarının tərkibində həmin yağdan istifadə edilir. Məsələn, dondurmaların hazırlanmasında”.

 Palma yağı və onun zərərləri ilə bağlı məlum informasiya Azərbaycanın idxal etdiyi bu yağların sonrakı aqibəti ilə araşdırmaların aparılmasını zəruri edir.

 İdxal olunan palma yağları hansı məhsulların hazırlanmasına sərf olunur? Niyə bu yağların sonrakı aqibəti haqqında heç bir məlumata rast gəlmək olmur? Bəs AQTA palma yağlarının sonrakı aqibəti – ondan hansı məhsulların hazırlanması, hazırlanan bu məhsulların insanların sağlamlığına, xalqımızın genefonduna necə təsir göstərməsi ilə bağlı hansı araşdırmalar aparıb? Aparıbsa, bu araşdırmaların nəticəsi hanı? Aparmayıbsa, niyə aparmayıb? Axı bu qurum bilavasitə qida təhlükəsizliyinə cavabdeh olan qurumdur və o, belə bir araşdırma aparmağa borcludur.

 Ümid edirik ki, AQTA heç deyilsə bundan sonra bu məsələni diqqət mərkəzində saxlayacaq və bu istiqmaətdə hansısa addımlar atmaqla öz vəzifə borcunu yerinə yetirmək zəhmətinə qatlaşacaq.

Lalə Əliyeva

Gundemxeber.org