“Azərenerji” ASC cəmi bir gün ərzində ümumi dəyəri 170 milyon manatdan çox olan 13 iri satınalma müqaviləsinə imza atıb. Maraqlısı budur ki, bu nəhəng dövlət sifarişlərinin böyük hissəsi formal olaraq fərqli, mahiyyətcə isə eyni mərkəzdən idarə olunan şirkətlərə həvalə edilib.

21 sentyabr 2026-cı il tarixində “Azərenerji” ASC tərəfindən keçirilən tenderlərin yekunları diqqətçəkən məqamları ortaya çıxarıb. Qurumun sədri Baba Rzayevin rəhbərliyi altında bağlanan müqavilələrin əsas payçısı iki şirkətdir: “Azconstruction” QSC və “ELECTRO İNDUSTRİES” QSC.

Bir Günə 158 Milyonluq 4 Nəhəng Müqavilə

İri dövlət sifarişlərində aslan payı “Azconstruction” QSC-yə nəsib olub. Şirkət yalnız bir gün ərzində ümumi dəyəri 157 988 389 manat təşkil edən 4 iri tenderin qalibi elan edilib:

30 746 000 AZN: Naxçıvan MR-da ümumi gücü 50 MVt (25+25 MVt) olan GES-lərin enerjisistemə inteqrasiyası işləri;

59 996 734 AZN: Yeni tikilən Yaşma Qovşaq Yarımstansiyası (YS) üçün avadanlıqların satın alınması;

21 280 660 AZN: Mövcud 220/10/10 kV-luq Qəbələ YS-nın 220/110/10 kV-luq YS-ya keçirilməklə yenidən qurulması;

45 964 995 AZN: 110/35/10 kV-luq GİS tipli Duzsuzlaşdırma YS-nın tikintisi, enerjisistemə inteqrasiyası və Yaşma YS-da genişləndirmə işləri.

Eyni tarixdə “ELECTRO İNDUSTRİES” QSC ilə də ümumi dəyəri 14 243 661 manat olan daha 2 müqavilə imzalanıb. Beləliklə, bir gün içində 170 milyon manatdan çox dövlət vəsaiti cəmi iki şirkətin hesabına köçürülüb.

Eyni Ünvan, Eyni Rəhbərlər: Kəsişən İzlər

Dövlət Vergi Xidmətinin hüquqi şəxslərin reyestr məlumatları bu iki şirkət arasında açıq-aşkar bağlılıq olduğunu göstərir:

Ünvan Birliyi: “AZCONSTRUCTION” QSC 2020-ci ilin iyunundan, “ELECTRO İNDUSTRİES” QSC isə iyulundan etibarən tam eyni ünvanda — Bakı şəhəri, Nizami rayonu, Heydər Əliyev prospekti, ev 187B ünvanında fəaliyyət göstərir.

Ortaq Rəhbərlər: Hər iki şirkətin qanuni təmsilçiliyi müxtəlif dövrlərdə Emin Telman oğlu Qurbanov və Natiq Yaqub oğlu Qarayev kimi eyni şəxslərə həvalə olunub.

Bu faktlar hər iki qurumun faktiki olaraq tək bir mərkəzdən və eyni şəxslər tərəfindən idarə olunduğunu sübut edir.

Şirkətlərin Arxasında Kimlər Dayanır?

Aparılan araşdırmalar və elektron medianın məlumatları tender çempionlarının arxasındakı əsas fiqurlara işıq salır:

1. Qalmaqallı Mingəçevir İES Təmiri və Emin Rzayev İddiası

“ELECTRO İNDUSTRİES” QSC-nin adı daha əvvəl Mingəçevir İstilik Elektrik Stansiyasının (İES) təmiri zamanı yaranmış maliyyə qalmaqalında çəkilib. Subpodratçı “Yapsan” MMC-nin rəhbərliyi görülən işlərin müqabilində yüz minlərlə manatlıq ödənişin edilmədiyini bildirərək məhkəməyə müraciət edib. Sahibkarların iddiasına görə, ödənişlərin saxlanılması və bu qanunsuzluqların arxasında “Azərenerji” ASC-nin sədri Baba Rzayevin qardaşı Emin Rzayev dayanır.

2. Rəşad Əhmədovun Biznes İmperiyası

“AZCONSTRUCTION” QSC-nin ilk təsisçisi Bayram Kərim oğlu Əhmədov olub. Məlumata görə, o, hazırda “Azərbaycan Sənaye Sığorta” ASC-nin Direktorlar Şurasının sədri olan Rəşad Əhmədovun atasıdır. R.Əhmədovun nüfuz dairəsinə daxil olan “Electro Industries” QSC, “Verdict Service Company” MMC və “AzConstruction” QSC kimi şirkətlər illərdir ki, “Azərenerji” ASC və “Azərişıq” ASC-nin keçirdiyi çoxmilyonluq tenderlərin daimi qalibinə çevriliblər.

Bütün Oxlar Eyni Ünvana Yönəlir

Reyestr sənədlərində qanuni təmsilçi kimi müxtəlif adlar qeyd edilsə də, tenderlərin paylanma mexanizmi və çoxmilyonluq dövlət sifarişlərinin mütəmadi olaraq eyni xətt üzrə ötürülməsi bütün diqqəti “Azərenerji” ASC-nin sədri Baba Rzayevə yönəldir. Bu miqyasda dövlət vəsaitlərinin uzun illər ərzində eyni şəbəkəyə daxil olan şirkətlərə həvalə edilməsi qurum rəhbərliyi ilə podratçılar arasındakı sıx bağlılığın göstəricisi kimi qiymətləndirilir.

Azərbaycanın hər bir bölgəsi bu Vətənin bir parçasıdır. Balakən də elə. 44 günlük Vətən müharibəsində bu torpağın oğulları Azərbaycanın ərazi bütövlüyü uğrunda canlarından keçdilər, sağlamlıqlarını itirdilər, şəhid oldular, qazi oldular. Onların anaları, bacıları, həyat yoldaşları, övladları isə bizim üçün adi vətəndaş deyil – baş tacımızdır.

Belə bir bölgədə səhiyyə məsələsinə münasibət də adi məsələ ola bilməz.Balakəndə fəaliyyət göstərən “AyMED” klinikası ilə bağlı “Aktualinfo.net” olaraq redaksiyamıza daxil olan məlumatlar isə bu baxımdan ciddi suallar doğurur.

Söhbət klinikanın rəhbəri Elşən Kərimov barədə yayılan məlumatlardan gedir.

Məlumatlara görə, Elşən Kərimov ixtisasca pediatrdır. Eyni zamanda onun dövlət tibb müəssisəsində – Balakən Rayon Xəstəxanasında “yarımştat həkim” kimi çalışdığı bildirilir. Bununla yanaşı, rəhbərlik etdiyi “AyMED” klinikasında UZM müayinələri apardığı, o cümlədən qadın pasiyentlərin süd vəzisi, qarın boşluğu və ginekoloji müayinələrində iştirak etdiyi iddia olunur.

Əgər bu məlumatlar doğrudursa, ortaya çox ciddi sual çıxır:

Pediatr ixtisası olan həkim hansı hüquqi və peşəkar əsasla ginekoloji UZM müayinəsi aparır?

Sualın mahiyyəti məhz budur.Burada məsələ kiminsə şəxsi fəaliyyətinə müdaxilə etmək deyil.Söhbət tibb sahəsində ən mühüm prinsiplərdən birindən – həkimin ixtisasına uyğun tibbi fəaliyyət göstərməsindən gedir.Azərbaycan qanunvericiliyində praktik tibb fəaliyyətinin ixtisasa uyğun həyata keçirilməsi nəzərdə tutulur. “Özəl tibb fəaliyyəti haqqında” qanunda da özəl tibbi praktikanın ixtisasa uyğun həyata keçirilməsi və praktik fəaliyyət göstərən şəxslər üçün müəyyən edilmiş tələblərə əməl olunması tələb edilir. Üstəlik, 2025-ci ildə qanunvericiliyə edilmiş dəyişikliklərdən sonra özəl tibb müəssisələrində praktik tibb fəaliyyəti ilə məşğul olan şəxslərin sertifikasiyası məsələsi daha da konkretləşdirilib. Qanunda sertifikasiya şəhadətnaməsi olmayan və ya qüvvədə olmayan şəxslərin praktik tibb fəaliyyətinə buraxılmasına yol verilmədiyi göstərilir.

O zaman suallarımız da konkret olmalıdır.

Elşən Kərimovun hansı ixtisas üzrə sertifikasiyası var?

Onun UZM fəaliyyəti üçün müvafiq ixtisası və peşə hazırlığı varmı?

Əgər varsa, bunu təsdiq edən sənəd mövcuddurmu?

Ginekoloji UZM müayinəsi aparmaq üçün hansı ixtisas və sertifikasiya tələb olunur və Elşən Kərimov həmin tələblərə cavab verirmi?

“AyMED” klinikasında göstərilən bu tibbi xidmətlərə hansı dövlət qurumu nəzarət edir?

Və ən əsası: bu fəaliyyət indiyədək aidiyyəti qurumlar tərəfindən yoxlanılıbmı?

Əgər yoxlanılıbsa, nəticəsi nə olub?

Əgər yoxlanılmayıbsa, niyə?

Məsələnin daha həssas tərəfi…

Burada bir məqamı xüsusi qeyd etmək lazımdır.

Qadın pasiyentin ginekoloji və ya süd vəzisi müayinəsi sadəcə tibbi prosedur deyil. Bu, həm də insanın şəxsi məxfiliyinə, ləyaqətinə və mənəvi rahatlığına maksimum həssaslıq tələb edən tibbi münasibətdir.

Həkimə müraciət edən insanın ilk gözləntisi peşəkarlıqdır. Pasiyent bilməlidir ki, onun qarşısındakı şəxs məhz həmin tibbi xidməti göstərmək üçün lazımi ixtisasa, hazırlığa və hüquqi səlahiyyətə malikdir.

İndi isə təsəvvür edin: bir bölgənin sakini, bəlkə də şəhid anası, şəhid bacısı, qazimizin ailə üzvü, ən həssas sağlamlıq problemi ilə bağlı həkimə müraciət edir.

O, qarşısındakı mütəxəssisə güvənir.Çünki həkim-pasiyent münasibətinin təməlində etibar dayanır.Bu etibarın sarsılması isə səhiyyə sisteminə vurulan ən ağır zərbələrdən biridir.

Ona görə də belə sualların cavabsız qalması cəmiyyətdə haqlı narahatlıq yarada bilər.

Biz heç kimin haqqında məhkəmə hökmü çıxarmırıq.Biz demirik ki, Elşən Kərimov qanun pozuntusuna yol verib.Biz sadəcə soruşuruq: əgər bütün bunlar qanunidirsə, bunu təsdiq edən sənədlər haradadır?

Əgər ixtisas və sertifikasiya tələbləri tam şəkildə yerinə yetirilirsə, aidiyyəti qurumlar bunu açıqlaya bilər.

Əgər hər şey qanunidirsə, niyə bu barədə ictimaiyyətə aydın məlumat verilmir?

Əgər qanun pozuntusu yoxdursa, sualların cavablandırılmasından kim çəkinir?

TƏBİB və Səhiyyə Nazirliyinə suallar…

Bu yazının əsas ünvanlarından biri məhz aidiyyəti dövlət qurumlarıdır.

TƏBİB-dən soruşuruq:

Elşən Kərimov Balakən Rayon Xəstəxanasında hansı vəzifədə və hansı iş qrafiki ilə çalışır?

Onun həmin müəssisədəki əmək fəaliyyəti ilə “AyMED” klinikasındakı fəaliyyəti arasında hər hansı uyğunsuzluq müəyyən edilibmi?

Səhiyyə Nazirliyindən soruşuruq:

Elşən Kərimovun ixtisası və sertifikasiya vəziyyəti özəl klinikada apardığı iddia olunan UZM müayinələrinə uyğundurmu?

“AyMED” klinikasında qadın pasiyentlərə süd vəzisi, qarın boşluğu və ginekoloji UZM xidmətlərinin göstərilməsi zamanı həmin xidmətləri həyata keçirən şəxslərin ixtisas və sertifikasiya sənədləri yoxlanılıbmı?

Əgər yoxlanılıbsa, nəticə necə olub?

Bu sualların cavabı cəmiyyət üçün vacibdir.Çünki səhiyyədə “mən belə edirəm” prinsipi ola bilməz.Burada insan həyatı var.Burada insan sağlamlığı var.Burada insanın ən şəxsi və həssas məkanı var.

Və burada dövlətin nəzarəti, həkimin peşə məsuliyyəti, klinikanın hüquqi öhdəliyi dayanır.

Bir klinikanın rəhbəri olmaq başqa,hər tibbi xidməti göstərmək bir başqa…

Özəl klinikanın rəhbəri olmaq insana avtomatik olaraq bütün tibbi ixtisaslar üzrə fəaliyyət göstərmək hüququ vermir.

Qanunvericilik tibbi fəaliyyəti ixtisas, sertifikasiya və digər peşə tələbləri ilə əlaqələndirir.

Ona görə də məsələni şəxsi müstəviyə çəkməyə ehtiyac yoxdur.Qoy sənədlər : sertifikat,ixtisas,lisenziya və icazələr danışsın.Aidiyyəti qurumların yoxlamaları danışsın.

Əgər hər şey qaydasındadırsa, bu, Elşən Kərimov və “AyMED” üçün də ən yaxşı cavabdır.Yox, əgər qaydalar pozulubsa, onda sual başqadır:

Bəs indiyədək niyə tədbir görülməyib?

Balakən sakini bu sualın cavabını bilməlidir.Çünki səhiyyədə nə vəzifə, nə klinikanın rəhbəri olmaq, nə də şəxsi nüfuz qanundan üstün ola bilməz.

Bu yazı kiminsə peşə fəaliyyətinə mane olmaq məqsədi daşımır. Əksinə, məqsəd sadədir: pasiyentin hüququ qorunsun, həkimin ixtisası aydın olsun, tibbi xidmət qanun çərçivəsində göstərilsin və dövlət nəzarəti öz işini görsün.

Şəhidlərimizin əmanət etdiyi bu torpaqda insan ləyaqətinə hörmət də, xəstə insanın hüququna hörmət də müqəddəs məsələdir.

Balakən camaatının da haqqı var soruşmağa:

Məni müayinə edən həkim həqiqətən həmin müayinəni aparmaq üçün lazımi ixtisasa və hüquqa malikdirmi?

Bu suala isə emosiyalar yox, sənədlər cavab verməlidir. “Aktualinfo.net” 

Gundemxeber.org

 

Bakı Ağır Cinayətlər Məhkəməsində ictimaiyyətdə "Milyonçu qardaşlar" işi kimi tanınan Bahadır Qasımov, qardaşı İkram Qasımov və onların yaxınlarının cinayət işi üzrə Məhkəmə prosesi yekunlaşıb.

Gundemxeber.org bildirir ki, hüquq-mühafizə orqanlarının keçirdiyi əməliyyat zamanı Yasamal rayonunda "Bahadırın bankı" kimi tanınan qanunsuz maliyyə şəbəkəsi ifşa olunmuşdu. İstintaq materallarına əsasən, bu sistem vasitəsilə xarici ölkələrə qanunsuz olaraq ümumilikdə 254 milyon 409 min manat vəsait köçürülüb və təqsirləndirilən şəxslər bu əməliyyatlardan milyonlarla manat xidmət haqqı əldə ediblər.

Məhkəmənin çıxardığı son hökmə əsasən, Bahadır Qasımova 2 il 4 ay cəza kəsilib. Onun həbsdə keçirdiyi müddət nəzərə alınaraq məhkəmə zalındanca azadlığa buraxılmasına qərar verilib. Qardaşı İkram Qasımov isə 4 il müddətinə azadlıqdan məhrum edilib.

Cəzaların müddəti ilə yanaşı, prosesin ən diqqətçəkən məqamı təqsirləndirilən şəxslərin istintaq dövründə həbs qoyulmuş yarım milyard (500 milyon) manat dəyərindəki daşınmaz əmlakı və aktivləri ilə bağlı olub. Məhkəmə qərarı ilə həmin əmlakların üzərindən həbs götürülüb.

Məhkəmənin bu qərarı və verilən cəza müddətləri sosial şəbəkələrdə və mətbuatda böyük müzakirələrə yol açıb.

Gundemxeber.org

“Azəriqaz” İstehsalat Birliyində kadr seçimi və imtahan prosesləri ilə bağlı ciddi narazılıq və şübhələrə yol açan yeni faktlar ortaya çıxıb. Mətbuata sızan məlumatlara görə, baş binada imtahandan keçə bilməyən namizəd üçün regional idarədə xüsusi “yaşıl işıq” yandırılıb.

Məlumata görə, yaxın günlərdə “Azəriqaz”ın əsas binasında keçirilən test imtahanında Göyçay şəhər sakini Mustafayev Zaur uğursuz nəticə göstərərək kəsilib. Lakin qalmaqal da bundan sonra başlayıb: iddia olunur ki, əsas binada uğursuzluğa düçar olan namizəd az sonra Ağsu Regional Qaz İstismar İdarəsində təkrar imtahana cəlb edilib.

Suallar əvvəlcədən verilib?

Sözügedən iddialar arasında ən diqqətçəkəni isə Zaur Mustafayevin Ağsudakı imtahana "hazırlıqlı" gətirilməsidir. Mənbələr bildirir ki, namizəd imtahan sualları ilə əvvəlcədən tanış edilib və nəticədə təkrar imtahandan "uğurla" keçməyi bacarıb.

Bu məqam haqlı olaraq böyük suallar doğurur:

Bakıda — Birliyin əsas binasında keçirilən rəsmi imtahanda uğursuz olan şəxs hansı hüquqi əsas və ya prosedurla Ağsu Regional İdarəsində təkrar imtahana buraxılıb?

Bütün namizədlər üçün vahid olan qaydalar nədən yalnız bir nəfər üçün dəyişdirilib?

Diqqət mərkəzindəki iki isim: Əfqan Yusifov və Xəqani Bəşirli

Yayılan məlumatlarda vurğulanır ki, Ağsu Regional Qaz İstismar İdarəsindəki bu təkrar imtahan prosesi Əfqan Yusifovun, “Azəriqaz” İstehsalat Birliyində isə birbaşa Xəqani Bəşirlinin nəzarəti altında həyata keçirilib.

Məsələnin tam aydınlaşdırılması, şəffaflığın bərpası üçün ilkin və təkrar imtahan protokollarının, qəbul edilən qərarların və sualların öncədən sızdırılıb-sızdırılmadığının araşdırılması vacib sayılır.

İctimaiyyət indi tək bir suala cavab gözləyir: “Azəriqaz”da imtahanlar bütün namizədlər üçün obyektiv və bərabər şəraitdə keçirilir, yoxsa "xüsusi tapşırıqlı" namizədlər üçün ayrı-ayrı qaydalar mövcuddur?

Qeyd: Gundemxeber.org redaksiyası olaraq, yazıda adıçəkilən şəxslərin və "Azəriqaz"ın rəsmi mövqeyini dərc etməyə hazır olduğumuzu bildiririk.

Tanınmış şair Səxavət Kəlbəcərli Azərbaycan Respublikasının Prezidenti İlham Əliyevə rəsmi müraciət ünvanlayıb. Şair müraciətində Ramiz Mehdiyevlə bağlı başlayan hüquqi proseslər fonunda yüksək vəzifəli şəxs Cavid Qurbanovun da fəaliyyətinin və xaricdəki böyük sərvətinin təcili araşdırılmasını tələb edib.

Səxavət Kəlbəcərli dövlətimizin 44 günlük Vətən müharibəsində qazandığı tarixi Zəfəri və ərazi bütövlüyünün bərpasını yüksək qiymətləndirərək bildirib ki, bu böyük uğurlara kölgə salan, dövlət vəsaitlərini mənimsəyən hər bir şəxs qanun qarşısında cavab verməlidir.

"Ramiz Mehdiyevə tətbiq olunan hüquqi prinsip Cavid Qurbanova da tətbiq edilməlidir!"

Müraciətdə vurğulanır ki, AMEA-nın keçmiş prezidenti Ramiz Mehdiyev barəsində dövlətə xəyanət və hakimiyyəti zorla ələ keçirmə cəhdi ilə yanaşı, vəzifə səlahiyyətlərindən sui-istifadə və cinayət yolu ilə əldə edilmiş əmlakın leqallaşdırılması ittihamları da var. Şair sual edir: Əgər eyni qanunsuzluqlar başqa məmurlar tərəfindən də törədilibsə, niyə onlar kənarda qalmalıdır?

Səxavət Kəlbəcərli uzun illər mühüm dövlət postlarında çalışmış Cavid Qurbanovun fəaliyyətinin hərtərəfli təftiş olunmasını istəyir. Müraciətdə xüsusilə aşağıdakı məqamların araşdırılması xahiş olunur:

Dövlət vəsaitlərinin mənimsənilməsi iddiaları: Cavid Qurbanovun rəhbərlik etdiyi qurumlarda büdcə vəsaitlərindən istifadə qaydaları;

Qanunsuz varlanma: Böyük biznes şəbəkəsinin və nəhəng əmlak sərvətinin hansı mənbələr hesabına formalaşması;

Birləşmiş Ərəb Əmirliklərindəki (BƏƏ) mülklər: Xarici ölkələrdə, xüsusən Dubayda olduğu iddia edilən dəbdəbəli əmlakların rəsmi gəlirlərlə uyğunluq təşkil edib-etməməsi.

"Tələbim obyektivlik və şəffaflıqdır"

Şair bildirib ki, heç kimi məhkəmə hökmü olmadan təqsirli elan etmək niyyətində deyil. Lakin qanun qarşısında hamı bərabər olmalıdır:

"Tələbim yalnız budur ki, yüksək vəzifələrdə çalışmış şəxslərin fəaliyyəti və sərvətlərinin mənşəyi qanun qarşısında obyektiv, şəffaf və eyni prinsiplər əsasında araşdırılsın. Cavid Qurbanov barəsində də dövlət vəsaitlərinin mənimsənilməsi və vəzifə səlahiyyətlərindən sui-istifadə faktları təsdiqlənərsə, cinayət işi başlanılmalı və hüquqi qiymət verilməlidir."

Müraciətin rəsmi strukturlar tərəfindən necə cavablandırılacağı və Cavid Qurbanovun fəaliyyəti ilə bağlı yeni hüquqi addımların atılıb-atılmayacağı ölkə ictimaiyyətinin diqqət mərkəzindədir.

Yazıda adıçəkilən şəxslərin də mövqeyini denləməyə hazırıq.

Gundemxeber.org

Prezident Administrasiyasının keçmiş rəhbəri, barəsində bir neçə maddə ilə cinayət işi qaldırılan Ramiz Mehdiyevlə bağlı istintaq başa çatıb. Cari ilin 21 sentyabr tarixində Bakı Ağır Cinayətlər Məhkəməsində onun işi üzrə ilk məhkəmə prosesi keçiriləcək. Belə bir həssas məqamda Abşeron rayonunun Novxanı kəndində Ramiz Mehdiyevə məxsus 5 hektarlıq böyük bir ərazinin məşhur iş adamlarından birinə satıldığı ilə bağlı məlumatlar yayılmağa başlayıb.

Bu barədə gundemxeber.org-un redaksiyasına məlumat verən kənd sakinləri qeyd ediblər ki, Novxanı ərazisində insanların rəhmətə gedən yaxınlarını dəfn etməyə qəbir yeri tapmadıqları bir vaxtda, vaxtilə Ramiz Mehdiyev tərəfindən zəbt edilən torpaqlardan 5 hektarlıq sahənin bir iş adamına satıldığı məlum olub. Kənd sakinləri hesab edir ki, ağır cinayətlərdə ittiham olunan Ramiz Mehdiyevin bu torpaq sahəsini indiki həssas məqamda necə satması ciddi suallar doğurur.

Maraqlıdır ki, baş verənlərlə bağlı həm Əmlak Məsələləri Dövlət Xidməti, həm də Novxanı bələdiyyəsinin torpaq şöbəsi susqunluq nümayiş etdirir. Halbuki Ramiz Mehdiyevlə bağlı hər bir olay dövlət səviyyəsində araşdırılmalı olan məsələdir və əlaqədar qurumların bu alqı-satqı haqqında məlumatlandırılması vacibdir.

Bundan başqa, sakinlərin iddiasına görə, Novxanıda hələ də Ramiz Mehdiyevin həyat yoldaşı Qalina Mehdiyeva, oğlu Teymur Mehdiyev, qohumları Telman Mehdiyev və Dilqəm Mehdiyevin adına külli miqdarda torpaq sahəsi mövcuddur. Bu torpaqların R.Mehdiyevin aparat rəhbəri olduğu dönəmdə ələ keçirildiyi ehtimal olunur. Sakinlər müvafiq qurumların, xüsusilə də hüquq-mühafizə orqanlarının Ramiz Mehdiyev və onun yaxınlarının Novxanıdakı torpaq sahələri ilə bağlı daha ciddi araşdırma aparmasını vacib hesab edirlər.

Gundemxeber.org

Prezident Administrasiyasının sabiq rəhbəri Ramiz Mehdiyevin dövlətə xəyanət, hakimiyyətin zorla ələ keçirilməsi və çirkli pulların yuyulması maddələri üzrə ittiham olunduğu cinayət işinin detalları açıldıqca, onun qurduğu "kölgə klanı"nın şəbəkəsi üzə çıxır. Bu kölgə imperiyasının mühüm halqalarından birinin isə Kənd Təsərrüfatı Nazirliyində formalaşdırıldığı iddia edilir.

 Mənfəət və Himayə Zənciri

 Sabiq PA rəhbəri Ramiz Mehdiyev və Prezidentin keçmiş köməkçisi Əli Həsənovun dəstəyi ilə Kənd Təsərrüfatı Nazirliyində öz şəbəkəsini quran əsas fiqur nazir müavini İlhamə Qədimovadır. Gundemxeber.org-un apardığı araşdırmalar göstərir ki, bu idarəetmə klanının arxasında həm də böyük biznes maraqları dayanır. İlhamə Qədimova əmisi, "Sədərək" Ticarət Mərkəzinin sahibi Yusif Qədimbəylinin ("Sədərək Yusif") lobbiçiliyi və Ramiz Mehdiyevin birbaşa patronajlığı ilə sürətlə vəzifə pillələrinə qalxıb.

Maraq doğuran əsas məsələlərdən biri də odur ki, Əli Həsənovun keçmiş köməkçisi Mehman Qədimbəylinin İlhamə Qədimovanın əmisi oğlu olduğu bildirilir. Əli Həsənov aqrar biznesini genişləndirərkən ən böyük dəstəyi İ. Qədimovadan alıb; kəndlilərin torpaq sahələrinin ucuz qiymətə ələ keçirilməsi müqabilində media üzərindən bu klanın toxunulmazlığı təmin edilib.

Soyad Manevrləri: Qədimov, Qədiməliyev, Qədimbəyli və Qədimli kimi soyad dəyişiklikləri edən bu ailə idarəçilikdə və biznesdə böyük mövqe tutaraq torpaq və resursların mənimsənilməsində ad çıxarıb.

 İnam Kərimova Qarşı Mediatik Təzyiqlər

 Şəbəkənin nazirlik daxilindəki əsas məqsədlərindən biri şəffaf kadr kimi tanınan sabiq nazir İnam Kərimovun sərbəst fəaliyyətini məhdudlaşdırmaq olub. R. Mehdiyev və Ə. Həsənovun nəzarətindəki media resursları vasitəsilə İnam Kərimova qarşı davamlı qarayaxma kampaniyaları təşkil edildiyi vurğulanır.

DTX tərəfindən aparılan istintaqın materialları Bakı Ağır Cinayətlər Məhkəməsinə göndərilib. Məhkəmə prosesinin başlanması ilə Mehdiyev-Həsənov cütlüyünün aqrar sektordakı bu qanunsuz biznes imperiyasının daha dərin qatlarının ifşası gözlənilir.

 Gundemxeber.org

Ölkənin əsas heyvandarlıq mərkəzləri sayılan Qazax, Tovuz, Ağstafa və Şəmkirdə heyvan bazarlarının fəaliyyətinə məhdudiyyət qoyulduğu, əhalinin bahalıq və çətinliklə üz-üzə qaldığı bir vaxtda Gədəbəydən şok məlumat gəlib. Şəhərin tən ortasında, heç bir rəsmi icazə olmadan qanunsuz mal bazarının fəaliyyətə başladığı iddia olunur.

Gundemxeber.org-a verilən məlumata görə, regionun iri heyvandarlıq mərkəzlərində bazarların açılmasına icazə verilmədiyi halda, Gədəbəy şəhərinin daxilində gizli və özbaşına şəkildə iri mal bazarı istifadəyə verilib.

"Milyardlar Dövriyyədədir, QİDA İsə Hər Şeyə Yaşıl İşıq Yandırır!"

Məlumata görə, Qida Təhlükəsizliyi Agentliyinin (QİDA) nümayəndələri əraziyə gələrək heç bir ciddi qadağa tətbiq etmədən bazara "fəaliyyət göstərə bilərsiniz" mesajı veriblər.

İddia olunur ki, bu qanunsuz prosesin arxasında böyük maliyyə maraqları və "multimilyarder" şəxslərin gizli sövdələşmələri dayanır. Qazax, Ağstafa, Tovuz və Şəmkir kimi böyük rayonların sakinləri heyvanlarını satmağa yer tapmadığı halda, Gədəbəydə böyük bir bazarın şəhərin mərkəzində açılması yerli camaat arasında böyük narazılıq və suallar doğurub.

"Yerevana Mal Satırıq?" – Sertifikat və Nəzarət Yoxdur!

Mənbənin bildirdiyinə görə, Gədəbəydə açılan bu bazarın ətrafında heç bir iri yaşayış və ya təsərrüfat massivi yoxdur. Bəs bu qədər mal-qara haradan gətirilir və kimlərə satılır?

"Qazaxda, Şəmkirdə, Tovuzda bazarları bağlayıb, Gədəbəyin mərkəzində qanunsuz bazar açmaq nə deməkdir? Biz Yerevana mal veririk, yoxsa kimə? Bu bazar kimin icazəsilə, hansı pulun müqabilində açılıb?" – deyə şikayətçilər vurğulayır.

Təcili Tədbir Görülməlidir!

Regional heyvandarlıq sektorunda çaşqınlıq yaradan bu məsələ ilə bağlı aidiyyəti qurumların – xüsusilə Qida Təhlükəsizliyi Agentliyinin və yerli icra hakimiyyəti orqanlarının təcili reaksiya verməsi, şəhər mərkəzindəki bu qanunsuz fəaliyyətin dərhal dayandırılması tələb olunur.

Məsələ ilə bağlı aidiyyəti qurumların da mövqeyini dərc etməyə hazırıq.

Gundemxeber.org